AF EGÓI & GUÐI POPPARA ...

Viðtal við Jakob Frímann Magnússon [JFM] í Heimsmálum Útvarps Sögu hefur vakið furðu margra. Þau Arnþrúður Karlsdóttir og Pétur Gunnlaugsson ræddu við popparann. JFM var fúll á móti og argur nú þegar eftirspurn eftir pólitískum kröftum hans er við alkul. Popparinn náði inn á Alþingi fyrir norðan 2021 þegar Inga sælent Sæland leitaði til “fræga liðsins“ til að stilla upp. Akureyringar göntuðust að popparinn hefði sötrað dýrasta rauðvínið á hótel KEA þegar hann leitaði eftir atkvæðum alþýðunnar 2021. Flokkaflakk popúlistans spannar svo ólíka flokka sem Samfylkinguna 2004, Íslandshreyfinguna 2007, Flokk fólksins 2021 og Miðflokkinn 2024 þegar hann datt útaf þingi.

 

AF MIÐBÆJARSTJÓRA & HANS

 

Margir minnast að popparinn varð miðbæjarstjóri sumarið 2008 þegar Ólafur F. Magnússon var vinalaus og hataður á borgarstjóra-sessu Ráðhússins. “Dags-eggsins sverði“ var sveiflað til þess að ná fram alræmdu læknisvottorði. Félagarnir sötruðu rauðvín á reykvískum börum. Tíu ár liðu, upp rann 2018. Popparinn hætti til að taka við forstjórastarfi á Lóni milli Eystra- og Vesturhorns. Þremur árum síðar 2021 var popparinn fullgildur þingmaður með Tomma tommaborgara en lífið er fallvalt. Það hefur verið sárt að fá sparkið haustið 2024 frá konunni við sundin blá. Í þættinum á Sögu opinberaðist að guð Jakobs Frímanns er hans eigið egó; harður húsbóndi sem setur sjálfan sig á stall ofar lýðnum, drambsamur og dæmandi. Jakob Frímann er fæddur í Köben en Tommy Robinson er “bara frá Lúton.“ Það hafa skiljanlega verið vonbrigði að skáldið frá Fagraskógi er ekki afi poppgoðsins.

 

AF PÖNKARA OG ÓGÆFUMANNI

 

Í þættinum hélt popparinn því fram að Tommy “nokkur“ Robinson sé “...pönkari og ógæfumaður“ sem hefði sópað og smalað milljónum óupplýstra Breta á götur Lundúna um síðustu helgi þar sem opinberast hefði “...nazismi og þjóðernishyggja.“ Tommy Robinson verðskuldi að vera á bak við lás og slá eins og Trump og Pútin. Fangelsun Tommy Robinson í hinu illræmda Woodhill fangelsi innan um múslima var verðskulduð að mati JFM. Elon “fucking“ Musk amerískur bílasali er að skipta sér af evrópskum stjórnmálum! Popparinn kvað Breta agressíva og grimma með karma sem væri að elta þá uppi; nýlenduglæpi fortíðar.

 

Það hitnaði í kolunum. Arnþrúður og Pétur andæfðu og bentu á að Bretar hefðu búið við 30 ára lygi stóru flokkanna í innflytjendamálum. Poppari okkar allra sá ekki ættjarðarást fólksins á götum Lundúna með breska og enska þjóðfána þar sem afar og ömmur, feður og mæður, synir og dætur sýndu samstöðu í friði og spekt. Samstöðuganga milljóna: Sameinum konungsdæmið - Unite the Kingdom barst ekki í tal.

 

CHARLIE KIRK & BIBLÍAN

 

“Hvað um covid þegar logið var að þjóðinni,“ spurði Arnþrúður. Popparinn átti sæti á Alþingi þegar covid-lygin gekk yfir. Hann svaraði engu um covid en hjólaði í Charlie Kirk og Biblíuna. Poppgoðinu var mikið niðri fyrir. Charlie Kirk hefði verið “...stórkostlega rangstæður, bókstafstrúarmaður.“ Kristnir menn séu í ruglinu eins og múslimar sem líti á konur sem geitur og kvikfé. Biblían sé skrifuð af misrugluðum körlum fyrir þúsundum ára. Hann bætti þó við að kristnin hefði fært okkur boðorðin tíu. “Höfum þau í heiðri en sleppum ruglinu ... Förum með trú eins og kynfæri okkar. Við erum ekki að sveifla þeim,“ sagði popúlistinn sem telur kynin jafnmörg og fólk getur talið og þar með sé málið útrætt. Popparinn leiðir ekki huga að verndun barna í leik- og grunnskólum þar sem þeim er innrætt að hafa fæðst í röngum líkama.

 

LINDIN & ARNAR JÓNSSON

 

Popparinn réðst á útvarpsstöðina Lindina og hneysklaðist á frænda sínum Arnari Jónssyni að lesa trúarbull: “Maðurinn skal vera höfuð konunnar, hún skal vera honum undirgefin og hlýðin og sýna virðingu í hvívetna,“ sagði hann fullur vandlætingar. Ég gúgglaði setninguna án árangurs. Popparinn er augljóslega ekki lesinn í Biblíunni enda eigið egó hans guð. Jakob Frímann hefði getað vitnað í Efesusbréf Páls postula um skyldur hjóna: “Sýnið Kristi lotningu og hvert öðru auðsveipni: konurnar eiginmönnum sínum eins og Drottni. Því að maðurinn er höfuð konunnar eins og Kristur er höfuð og frelsari kirkjunnar, líkama síns. Eins og kirkjan lýtur Kristi, þannig lúti og konurnar eiginmönnum sínum í öllu. Karlmenn, elskið konur ykkar eins og Kristur elskaði kirkjuna og lagði sjálfan sig í sölurnar fyrir hana ... Þess vegna skal maður yfirgefa föður og móður og búa við eiginkonu sína og munu þau tvö verða einn maður. Þetta er mikill leyndardómur.“ Auðmýkt er lykilhugtak kristinnar trúar. Jesús Kristur dó fórnardauða fyrir mannkyn. Maður er verndari konu sinnar eins og Kristur er verndari mannkyns. Konan er vörslumaður lífs á jörðu.