Láttu þá í veðrinu vaka að séra Friðrik hafi unnið til saka ...

Borgaryfirvöld hafa boðað að stytta séra Friðriks Friðrikssonar [1868-1961] við Lækjargötu verði fjarlægð eftir útgáfu bókar sagnfræðingsins Guðmundar Magnússonar, Séra Friðrik og drengirnir hans. Nafnlausar ásakanir koma fram í verkinu frá manni á áttræðisaldri, líklega fæddur 1945. Séra Friðrik var sem sagt 77 ára þegar ásakandi fæddist. Guðmundur kveður fund ásakanda með séra Friðriki hafa verið „um“ 1956 þegar hann var 11 ára drengur. Atvikið var sumsé þegar séra Friðrik var á áttugasta og áttunda aldursári, hrumur, sjóndapur, líklega blindur. Á grundvelli þessa nafnlausa framburðar er æran höfð af séra Friðriki sem sagður er hafa vangað og þreifað andlit drengsins. Séra Friðrik lést í mars 1961 á 93 aldursári elskaður og dáður.

Sagnfræðiverk er reist á nafnlausri ásökun á hendur öldruðum manni. Jón Magnússon hæstaréttarlögmaður hefur bent á að grunnreglur réttarríkisins séu brotnar á séra Friðriki að honum látnum. KFUM hafi brugðist arfleifð séra Friðriks. Jón hefur boðist til að taka að sér málsvörn séra Friðriks samtökunum að kostnaðarlausu. Ekki megi bregðast grunnstoðum réttarríkisins hvort sem fólk sé lífs eða liðið. Það hafi gerst að séra Friðriki látnum. Jón kveðst hafa skömm á framgöngu KFUM sem hafi auglýst að hafið sér yfir „...skynsamlegan vafa, að ásakanir um kynferðislegt ofbeldi af hálfu sr. Friðriks Friðrikssonar séu réttar.“ Ófagleg athugun KFUM fór að baki luktum dyrum leyndarhyggju. Trausti KFUM var glatað á augabragði í Kastljósi þar sem slegið var upp költ-fundi en ekki upplýstri umræðu. Jón bendir á snautlegan rógburð forstýru Stígamóta. Hvernig á kristið fólk að geta treyst að börn þeirra séu ekki kynvædd í sumarbúðum? Snúa strákar heim strákar og stelpur stelpur en ekki uppfull efasemda um kyn sitt?  

ÓGLEYMANLEGAR MINNINGAR

Í kjölfar útgáfu ritverksins um séra Friðrik hefur 89 ára maður lýst reynslu sinni af samskiptum við séra Friðrik. Í grein í Morgunblaðinu lýsir Rúnar Guðbjartsson flugstjóri og sálfræðingur fæddur 1934, reynslu sinni. "Hann [séra Friðrik] tók þétt­ings­fast utan um mig og setti vang­ann sinn á minn vanga og knúsaði mig og strauk ekki ósvipað því sem faðir minn gerði við mig í mik­illi gleði eða sorg. ... En að fá að hitta séra Friðrik og fá knús hjá hon­um og vera með hon­um að syngja á þessu su­markveldi eru mér ógleym­an­leg­ar minn­ing­ar," skrifaði Rúnar af mikilli virðingu "um séra Friðrik góða". Þeir hafi líklega hist árið 1945 þegar hann var 10-11 ára en Guðmundur telur fund þeirra hafa verið 1946 þegar Rúnar var á tólfta ári. Rúnar kveðst hafa ásamt 5-6 drengjum farið inn í herbergi sem sagnfræðingurinn gerir að svefnherbergi. Af hverju? Guðmundur segir í viðtali við Morgunblaðið „... að ef ævisögur eigi bara að vera helgisögur og skáldsögur sé lítið varið í þá grein bókmennta.“ Mogginn vitnar í fjölmiðilinn Heimildina um að „...stóra opinberunin í bókinni sé að séra Friðrik hafi misnotað ungan dreng á Íslandi og verið með barnagirnd.“ Hversu ógeðfelld er þessi blaðamennska?  

 

FLÝGUR FISKISAGA

Sagnfæðingurinn, fjölmiðlarnir og pólitíkin leggjast á eitt með Gróu á Leiti. Svona flýgur fiskisaga. Guðmundur kveður sögu Rúnars staðfesta „...ákveðna drengi [hafa verið valda] til að fara eina inn í svefnherbergi hans, þar sem hann vangar þá, knúsar og strýkur.“ Svo! Fimm sex strákar samtímis með séra Friðriki. Fyrir Rúnari var það ógleymanleg minning 11 ára drengs. Fyrir nafnlausum ásakanda tíu árum síðar er snerting kölluð áreitni gamals manns. Úr því Guðmundur ákvað að leita meintra dökkra hliða séra Friðriks þá urðu það að vera heimildir frá fyrstu áratugum 20. aldar fram að síðari heimstyrjöld en ekki saga af hrumum, blindum, gömlum manni á áttugasta og áttunda aldursári, gróusaga, ærumeiðing. Ásakanir Guðmundar á hendur séra Friðriki eru ekki sagnfræði. Ég fullyrði að undir ritstjórn Matthíasar og Styrmis á minni tíð hefði Mogginn beðist afsökunar á mistökum blaðsins að bergmála gróusögu. Páll Árdal samtímamaður séra Friðriks orti:

 

Ef ætlarðu að svívirða saklausan mann,
þá segðu aldrei ákveðnar skammir um hann,
en láttu það svona í veðrinu vaka,
þú vitir, að hann hafi unnið til saka.

 

Ég var níu ára gamall þegar séra Friðrik lést álitinn heilagur maður af samtíð sinni. Séra Friðrik er einn ástsælasti kristni leiðtogi þjóðarinnar. Hinn kristni trúir á líf í ljósi, sköpun Drottins, Jesú Krist og heilagan anda meðan hinn guðlausi kveðst koma úr myrkrinu þar sem ekkert sé, morkni og rotni að loknum lífsspretti. Fyrir hundrað árum lásu menn Biblíuna, Íslendingasögurnar og Passíusálmana en í okkar samtíma lesa menn glæpasögur sem gera út á myrkur ódæðisverka. Páll postuli sagði fyrir tvö þúsund árum að baráttan sé ekki við menn af holdi og blóði heldur andaverur vonskunnar. Þetta hafa menn vitað um árþúsundir en á okkar myrka samtíma ræður dómstóll götunnar. Baráttan er í andaheimum. Sú staðreynd að Jesú Kristi hafi verið úthýst úr skólum er vitnisburður um hnignun. Þau ætla að svipta okkur vestrænni kristinni siðmenningu og færa okkur myrkur nýrra miðalda. Kemur Alþingi til varna réttarríkinu, þó ekki sé nema einn þingmaður?

Athugasemdir

[Guðmundur Örn Ragnarsson, 22.12.2023 kl. 00:20]

Hafðu þökk fyrir frábæra grein Hallur. Þú skrifar eins og ærilegum kristnum blaðamanni sæmir.

Pílatus gekk aftur út fyrir og sagði við þá: “Nú leiði ég hann út til yðar, svo að þér skiljið, að ég finn enga sök hjá honum.” Jesús kom þá út fyrir með þyrnikórónuna og í purpurakápunni. Pílatus segir við þá: “Sjáið manninn!” Þegar æðstu prestarnir og verðirnir sáu hann, æptu þeir: “Krossfestu, krossfestu.” (Jóh. 19:4-6).

[Guðmundur Örn Ragnarsson, 22.12.2023 kl. 00:27]

Menn færðu börn til Jesú að hann snerti þau.

En lærisveinarnir átöldu þá. Þegar Jesús sá það sárnaði honum og hann mælti við þá: Leyfið börnunum að koma til mín, varnið þeim eigi því að slíkra er Guðs ríki.

Sannlega segi ég ykkur: Hver sem tekur ekki við Guðs ríki eins og barn mun aldrei inn í það koma. Og Jesús tók þau sér í faðm, lagði hendur yfir þau og blessaði þau. (Mark. 10:13-16).

Því að þann tíma mun að bera, er menn þola ekki hina heilnæmu kenningu, heldur hópa þeir að sér kennurum eftir eigin fýsnum sínum til þess að heyra það, sem kitlar eyrun. Þeir munu snúa eyrum sínum burt frá Sannleikanum og hverfa að ævintýrum. (2. Tim. 4:3-4).

[Guðmundur Örn Ragnarsson, 22.12.2023 kl. 00:36]

Verið minnugir leiðtoga yðar, sem Guðs orð hafa til yðar talað.

Virðið fyrir yður, hvernig ævi þeirra lauk, og líkið eftir trú þeirra.

Jesús Kristur er í gær og í dag hinn sami og um aldir. (Hebr. 13:7-8).

[Jónatan Karlsson, 22.12.2023 kl. 03:14]

Ég er þér hjartanlega sammála hvað ógeðfeld þessi aðför er að þessum góða manni, sem þjóðin og börnin hennar elskuðu og dáðu, allt þar til að einhver byrjaði að láta það svona í veðrinu vaka og svo framvegis.

Í biluðum tíðarandanum, þar sem alskyns ónáttúra er vegsömuð og gömul og gegn gildi smáð og svívirt, þá er mögulega skiljanlegt að veikgeðja aðilar, jafnvel í hærri stöðum fljóti með að þeim feigðarósi sem við vöðum þegar í, fremur en að stíga niður fæti og hætta eigin mannorði og eiga þá á hættu að verða úthrópaðir sem bandamenn níðinga og mögulega næstir á aftökulistanum.

[Hallur Hallsson, 22.12.2023 kl. 12:55]

Bestu þakkir fyrir innlegg ykkar ... Ég hitti aldrei séra Friðrik & var 9 ára þegar hann lést. Hugsaði oft, hve lánsamir strákar voru sem sóttu Vatnaskóg. Ég hygg að menn hafi litið á séra Friðrik sem heilagan mann ... Honum fylgdi sérstök ára, yfirbragð ... Heilagur Andi. Sá sem kemst í snertingu við Heilagan Anda er aldrei samur eftir ... Jesú sagðist varða leiðina til Drottins & senda Heilagaan Anda ... Ekkert fer meir í taugar hins guðlausa en trú hins kristna á Jesú & Heilagan Anda ... 

[Tómas Ibsen Halldórsson, 22.12.2023 kl. 14:10]

Heill og sæll Hallur og eins Guðmundur Örn og Jónatan.

Aldrei var ég meðlimur KFUM en ég hef séð í gegnum tíðina hversu mikið það hefur gefið þeim sem fóru í Vatnaskóg og sóttu KFUM fundi, það hefur haft áhrif á líf þeirra til mikillar blessunar. Starf Sr.Friðriks hefur augljóslega verið mörgum til mikillar blessunar og það stendur uppúr öllu þeim órökstudda áróðri sem rekinn er gegn honum nú í dag og það að honum látnum.

Við horfum uppá það í dag að komið er gegn kristni. Hér er greinilega verið að rakka niður það starf sem KFUM og KFUK hefur viðhaft á landi okkar og það til að brjóta niður kristilegt starf og þar með halda börnum frá því að sækja kristilega fræðslu. Á sama tíma eru skólar landsins að innræta óeðlilega kynhneigð í ung börn allt það sem er Guði andstigð.

Óguðleikinn veður uppi í landi okkar sem aldrei fyrr. Í öðru eða þriðja eldgosinu á Reykjanesskaga kom til mín að hér væri aðvörun frá Guði til þjóðarinnar, en hún heyrir ekki. Núna er jarðskjálftar hrelldu Grindvíkinga og síðan eldgos við bæjardyrnar er enn ein viðvörun frá Drottni allsherjar. Ef við sem einstaklingar og þjóðin í heild vaknar ekki af svefni dauðans og snúum okkur til Hans sem gefur líf, mun illa fara fyrir okkur. Við munum kannski ekki sjá það á Reykjanesskaganum það gæti alveg eins orðið annarsstaðar á landinu, en til mín kom að hér ætti eftir að verða mikil fólksfækkun, hvort það verður af náttúrunnar völdum, vegna veiru eða af mannavöldum veit ég ekki.

Við getum ég víða um heim að hræðilegir hlutir eru að gerast af náttúrunnar völdum, þar er ég ekki að tala um loftslagsbreytingar, heldur eru það afleiðingar af illsku og Guðleysi.

Eitt dæmi er að í vikunni fékk Tyrkneskur þingmaður hjartaáfall í lok ræðu þar sem hann var að kalla eftir reiði Allah gegn Ísrael. Þingmaðurinn lét lífið á sjúkrahúsi skömmu síðar að mér skilst. Flóð og ofsaveður hafa hrjáð margar þjóðir þar sem Guðleysi hefur ríkt. Hvers megum við vænta???

[Skúli Jakobsson, 22.12.2023 kl. 19:17]

Laun heimsins eru vanþakklæti.

Okkar heimur er fallinn.