Af reiðikasti Arnars, ofsa & heift Blika

Bestu liðin í íslenskum fótbolta áttust við í stórkostlegum leik þar sem Blikar skoruðu tvö mörk í uppbótar tíma og jöfnuðu 2-2. KSÍ hefur dæmt Sölva Geir og Loga Tómasson í eins leiks bann. Ég hygg að það komi ekki á óvart. Arnar Gunnlaugsson þjálfari beindi reiði sinni í garð dómara leiksins og rifjaði upp liðna dómaraskandala á meðan Óskar Hrafn Þorvaldsson þjálfari og Höskuldur Gunnlaugsson fyrirliði beindu ofsa og heift að Víkingum svo ég man ekki eftir öðru eins svívirðingum í garð andstæðinga, bara aldrei. Sannarlega var um að ræða fádæma dómaraskandal í Kópavogi sem hélt Blikum inn í leiknum. Ég vil nefna þrjú atriði. Skoðum hvað gerðist. Atvik no. 1) Daníel Djuric sem átti stjörnuleik gegn Blikum skoraði snemma leiks og áliðið fyrri hálfleik var hann kominn einn í gegn. Varnarmaður Blika setti olnboga í bak Daníels, hrinti honum svo hann féll rétt utan vítateigs. Blikinn átti að fá rautt en dómari leiksins Ívar Orri Kristjánsson gaf Daníel gult! Af hverju í veröldinni átti Daníel að láta sig detta einn á markmann. Skelfileg dómgæsla. En hún átti eftir að versna. No. 2) Í  lok fyrri hálfleik var Daníel aftur einn á markmann þegar Ívar Orri flautar til hálfleiks. Það voru komnar 11 sekúndur inn í uppbótartíma. Þetta er enn skelfilegri dómgæsla en staðan þá var 2-0 fyrir Víking. No. 3) Ívar Orri leyfði sókn Blika að klárast þó komið væri vel yfir tíma. Skelfileg framganga í ljósi atviksins á 45. mínútu. „Ívar Orri var ömurlegur í leiknum, hreinasta skömm,“ sagði Arnar í reiðikasti. Ég er honum sammála. Blikar eiga Ívari Orra mikið að þakka, tvö stig af Víkingi eitt til Blika.

ÞRÍR RISA SKANDALAR

Arnar nefndi nokkur atvik, þar á meðal tvo af mestu skandölum í sögu íslenskrar knattspyrnu, báða vestur í bæ. Í fyrra skiptið vorið 2020 þegar þrír af fremstu haffsentum íslenskrar knattspyrnu voru reknir af velli; Kári Árna, Sölvi Geir og Halldór „Herra Víkingur“. Það var svakalegt. Það sem gerðist vestur í bæ árið 2021 trompaði það. Það var komið fram á 94. mínútu. Íslandsmeistaratitill í húfi og dómari leiksins dæmdi víti á Kára Árna. Síðar kvaðst dómarinn aldrei hafa séð boltann fara í hönd Kára. Þrjátíu ár voru frá síðasta Íslandstitli Víkings, 90% líkur að rynni þeim úr greipum en Ingvar varði vítið. Ívar Orri hefur bætt mistökum sínum á dögunum á ferilskrá sína við hlið hinna. Þessi ósköp geta þessir annars ágætu menn aldrei strokað út. KSÍ á eftir að skoða ummæli Arnars svo og heiftúðug ummæli Blika.

Ég kynntist Óskari Hrafni fyrir 20 árum, öflugur maður líkt og þjóðin hefur séð undanfarin ár en heift hans svakaleg. „Víkingar eru fávitar og hafa alltaf verið fávitar.“ Já, sæll. Höskuldur fyrirliði líkti Víkingum við „litla hunda sem gelta hátt.“ Rosalegar svívirðingar, aldrei aldrei heyrt svona áður. Hárblásara taktík. Ég hef ekki séð þá félaga biðjast afsökunar né klúbbinn. Maður veltir fyrir sér hvað á gangi í Breiðabliki stolti Kópavogs. Auðvitað gengur svona ekki í áhugamannafélagi. Öll þrenn ummælin munu vera til skoðunar í KSÍ. Það er vel.

GUMMI BEN Í ALLA REGNBOGANS LITI

En af þessu tilefni verð ég að nefna Stúku Gumma Ben og félaga. Gummi Ben einn af íkonum íslenskrar íþróttafréttamennsku getur ekki leyft sér að detta í forarpitt hlutdrægni. Það gengur ekki að vera bara rauður, gulur, grænn, blár né svart hvítur. Gummi Ben verður að klæðast öllum regnbogans litum. Íslensk knattspyrna á svo mikið undir heiðarlegri umfjöllun.